Klámframleiðendur hætta við ferð til Íslands

Aðstandendur ferðar klámframleiðenda sem fyrirtækið FreeOnes hugðist standa fyrir hingað til lands 7.-11. mars hafa ákveðið að hætta við ferðina eftir að stjórn Bændasamtakanna, sem á Hótel Sögu, ákvað að vísa hópnum frá hótelinu þar sem hann hafði bókað gistingu fyrir um 150 manns.

FreeOnes segir í tilkynningu á heimasíðunni Snowgathering.com að leitað verði lögfræðiaðstoðar til að innheimta kostnað sem skipuleggjendur hafi haft af ráðstefnunni. Á heimasíðunni segir að forsvarsmenn Hótels Sögu hafi ekki höndlað þann þrýsting sem fjölmiðlar og stjórnmálamenn hafi beitt og gefið eftir vegna þrýstings frá hópum sem telji að ómögulegt sé að fólk vilji starfa innan klámiðnaðarins. Reynt hafi verið að fara að öllum óskum og kröfum hótelsins eftir fjölmiðlasprenginguna eins og það er kallað.

Þá saka aðstandendur Snowgathering æðstu yfirvöld á Íslandi um að þrýsta á lögreglu og Útlendingastofnun um að finna leiðir til að hindra komu hópsins til landsins. Það hafi verið gert þrátt fyrir að FreeOnes hafi lýst því yfir í nokkrum tilkynningum að ekki yrði farið gegn íslenskum lögum um bann við klámi í ferðinni. Svo virðist sem þeir sem tengist klámi séu algjörlega óvelkomnir til landsins.

Þá virðist landið hafa meiri áhyggjur af því að fullorðnar konur fækki fötum - jafnvel með eigin vilja og án þrýstings- en útrýmingu hvala.

Bændastamtökin sendu fyrr í dag frá sér yfirlýsingu þar sem greint var frá því að hópurinn fengi ekki gistingu á Hótel Sögu og að ákvörðunin væri studd af Rezidor Hotel Group sem væri rekstaraðili Radisson SAS hótelkeðjunnar. Með þessu vildu Bændasamtökin lýsa vanþóknun sinni á þeirri starfsemi sem hópurinn tengdist.