Komið í veg fyrir sprengjuárás í Tyrklandi

Tyrkneskri lögreglu tókst í dag að koma í veg fyrir alvarlegt sprengjutilræði, þegar hún fann bíl hlaðinn sprengiefni í margra hæða bílageymslu í höfuðborg landsins, Ankara.

Nærliggjandi hús og verslanir voru umsvifalaust rýmd, meðan lögregla aftengdi sprengjuna.

Ekki er vitað hver kom sprengjunni fyrir, en kúrdískir aðskilnaðarsinnar, öfgafullir vinstrisinnar og Íslamistar hafa allir staðið fyrir árásum í Tyrklandi síðustu ár.

Að sögn tyrkneskra fjölmiðla voru þrjú hundruð kíló af sprengiefni í bílnum. Tyrknesk útgáfa CNN sjónvarpsstöðvarinnar  sagði að sprengjan hefði líkst þeim sem notaðar voru í árásum á breska sendiráðið, og útibú HSBC bankans í Ankara árið 2003. Samtök tengd Al Kaída eru talin hafa staðið fyrir þeim.