Ferguson vill ná toppsætinu

Sir Alex Ferguson segir takmark Manchester United nú vera að ná efsta sætinu í F-riðli Meistaradeildarinnar eftir að liðið tryggði sér sæti í 16-liða úrslitunum með 4-0 sigri á Dynamo Kiev í gær.

United er í efsta sæti riðilsins með 12 stig þegar tveir leikir eru eftir en Roma kemur þar á eftir með 7 stig. "Ef við vinnum Sporting í næsta leik munum við tryggja okkur efsta sætið í riðlinum og ég vil leggja mikla áherslu á það," sagði Ferguson og sagði Kænugarðsmenn hafa ætlað að forða sér frá kinnroða með því að leggjast í vörn í gær.

"Þegar lið í okkar stöðu mætir liði sem spilar svona stífan varnarleik - geta leikirnir orðið dálítið leiðinlegir. Kiev kom hingað með það fyrir augum að líta ekki illa út þegar flautað yrði af," sagði Ferguson sem hélt upp á 21 árs afmæli sitt hjá félaginu í leiknum.