Grant: Við lékum til sigurs

Avram Grant, stjóri Chelsea, segist vonast til þess að sigur liðsins á Valencia í kvöld verði til að þagga aðeins niður í gagnrýnisröddunum á Englandi. Hann segir hugarfar leikmanna lykilinn að sigrinum í kvöld.

"Við komum hingað til að ná í sigur og leikmennirnir voru mjög vel undirbúnir fyrir leikinn. Þið hafið séð hugarfar leikmanna síðustu tvær vikur - þetta hefur verið gríðarlega erfitt en andinn var góður allan tímann. Ég hef sagt það allan tímann. Við þjálfararnir verðum að sanna það fyrir stuðningsmönnunum alveg eins og leikmennirnir að við getum gefið þeim það sem þeir vilja og það er gott að vera komnir á toppinn í riðlinum. Ég hef verið á toppnum hvar sem ég hef verið og ætla mér að gera það líka á Englandi," sagði Grant eftir leikinn á Spáni í kvöld.