Naomi Campbell réttir Victoriu Beckham sáttarhönd

Naomi Campbell ætlar að taka upp tólið og hringja í Victoriu Beckham til að bjóða henni að taka þátt í stjörnum prýddri góðgerðartískusýningu til styrktar fórnarlamba flóðanna í Bretlandi í sumar.

Þær stöllur hafa ekki talast við í rúm sjö ár en Victoria lét einhver misvel valin orð falla um Naomi í sjónvarpsþætti sínum Victoria's Secrets árið 2000. Í kjölfarið kallaði Naomi Victoriu meðal annars belju á opinberum vettvangi og hafa þær ekki talast við síðan.

Nú vill Naomi reyna að ná fram sáttum. "Ég ætla að hringja í hana af því hún er svo mikilvæg persóna í tískuiðnaðinum. Hún verður eiginlega að vera með. En hún býr auðvitað í Los Angeles og ég veit ekki hvort hún hafi gert önnur plön. En ég vona að hún geti verið með okkur," segir Naomi.

Yasmin Le Bon, Elle Macpherson og Jodie Kidd hafa allar fallist á að vera með í sýningunni og þá mun Kate Moss einnig vera viðstödd og sýna hönnun sína. "Við vildum leggja okkar af mörkum til að hjálpa þeim sem urðu illa úti í flóðunum, segir Naomi.

Sýningin sem ber heitið Fashion For Relief mun fara fram þann 20. september næstkomandi eða í lok tískuvikunnar í London.