Systir grunaðs hryðjuverkamanns segir dönsku lögregluna ómanneskjulega

Það var ómanneskjulegt hvernig lögreglan réðst inná fjölskyldu mína um miðja nótt, segir systir eins þeirra sem var í gær úrskurðaður í gæsluvarðhald í Kaupmannahöfn, vegna gruns um hryðjuverkastarfsemi.

Annar tveggja sem voru úrskurðaðir í gæsluvarðhald í gær, eftir aðgerðir dönsku leyniþjónustunnar, var 21 árs karlmaður af afgönskum uppruna.

Hann býr með foreldrum sínum og tveimur systrum í Avedøre hverfinu í Kaupmannahöfn. Önnur systir hans segir að fjölskyldan hafi vaknað við hávaðann í lögreglumönnum þegar þeir ruddust inn í íbúðina og skipuðu öllum að leggjast á gólfið. Hún segir að lögreglan hafi miðað byssu að andliti föður síns og bróður.

Lögreglan lagði hald á tölvubúnað, myndavélar, sjö farsíma fjölskyldunnar og 70.000 íslenskar krónur. Systirin hélt sig væri að dreyma, og er orðlaus yfir því hversu ómanneskjulega danska lögreglan gekk fram, með því að ryðjast inná fjölskyldu hennar meðan allir voru í fastasvefni.

Alls voru átta manns handteknir í aðgerðunum í gær. Indverjinn David Karn er hælisleitandi í Danmörku. Hann kynntist einum hinna handteknu fyrir nokkrum dögum, og sá bauð David samastað í íbúð sinni.

Það kom David verulega á óvart þegar félagi hans var handtekinn vegna gruns um hryðjuverk. David segir manninn hafa reynst sér vel, og að hann sé ekki illa innrættur.