Meintir hryðjuverkamenn tengdust al-Qaida

Mennir sem handteknir voru í Kaupmannahöfn í nótt grunaðir um að leggja á ráðin um hryðjuverk, tengdust alþjóðlegum hryðjuverkasamtökum, þar meðal forystumönnum innan al-Qaida. Þetta kom fram í máli Jakobs Scharf, yfirmanns dönsku leyniþjónustunnar, á blaðamannafundi í morgun.

Alls voru átta manns handteknir í aðgerðum dönsku leyniþjónustunnar í nótt og telur leyniþjónustan að hún hafi komið í veg fyrir hryðjuverk. Leyniþjónustan hafði fylgst með mönnunum í nokkra mánuði að sögn Schraf en hann bætti við að í Danmörku væru manneskjur sem hefðu bæði viljann og styrkinn til þess að gera hryðjuverkaárásir. Ekki kom fram hvar mennirnir ætluðu að láta til skarar skríða.

Búist er við því að farið verði fram á gæsluvarðhald yfir að minnsta kosti tveimur mannanna en þeir eru allir af erlendu bergi brotnir og á aldrinum 19-29 ára. Sex mannanna eru danskir ríkisborgarar en tveir með dvalarleyfi í landinu.

Lögreglan réðst inn á alls ellefu stöðum í borginni og á einum staðanna voru íbúðir í nágrenninu rýmdar af ótta við óstöðugt sprengiefni sem var á staðnum. Voru sprengjusérfræðingar kallaðir til til að fjarlægja það.