Bush segir hernaðarleg sjónarmið ráða stærð liðsafla í Írak

Ákvörðun um að fækka liðsafla Bandaríkjamanna í Írak mun ráðast af hernaðarlegum sjónarmiðum en ekki pólitískum. Þetta kom fram í ræðu sem George Bush, bandaríkjaforseti, hélt fyrir bandaríska hermenn í Írak í dag. Óvænt heimsókn forsetans til Íraks lauk í kvöld þegar hann hélt áleiðis til Sidney í Ástralíu.

Í ræðu sem forsetinn hélt fyrir bandaríska landgönguliða í Anbar héraðinu í Írak í dag kom fram að ákvörðun um að kalla hermenn til baka frá Írak muni ráðast af hernaðarlegum hagsmunum. Hann sagði það ekki koma til greina að láta pólitískan þrýsting ráða neinu þar um.

George Bush kom til óvæntrar heimsóknar til Íraks í dag. Í för með forsetanum var einnig Robert Gates, varnarmálaráðherra landsins. Forsetinn fundaði meðal annars með David Petraeus, hershöfðingja Bandaríkjamanna, og Ryan Crocker, sendiherra Bandaríkjanna í Írak.

Heimsókninni lauk í kvöld þegar Bush hélt áleiðis til Sidney í Ástralíu til að sitja fund leiðtoga ríkja við Kyrrahafið.