Þúsundir flýja fellibylinn Felix

Þúsundir manna á austurströnd Mið-Ameríku hafa flúið heimili sín vegna komu fellibylsins Felix. Hann stefnir nú í átt að Níkaragva en bylurinn er nú skilgreindur sem 4. stigs fellibylur.

Vindhraðinn mælist nú allt að 64 metrar á sekúndu. Þúsundir íbúa á austurströnd Níkaragva og Hondúras hafa flúið heimili sín og mörg hundruð ferðamenn hafa einnig flúið svæðið. Óttast er að kaffiframleiðsla á svæðinu muni raskast verulega vegna bylsins og hækkaði heimsmarkaðsverð á kaffi á mörkuðum í dag.

Fellibylurinn Felix er annar stóri bylurinn sem gengur yfir Mexíkóflóa á stuttum tíma. Í síðasta mánuði létu 27 manns lífið þegar fellibylurinn Dean gekk yfir svæðið.