9 ára barnshafandi stúlka í mæðrahúsi ÞSSÍ

Níu ára barnshafandi stúlka hefur dvalið í mæðrahúsi sem Þróunarsamvinnustofnun Íslands lét byggja í Bluefields í Níkaragva. Stúlkunni var nauðgað af frænda sínum og eru fóstureyðingar með öllu bannaðar í landinu. Líkur eru á að stúlkan lifi ekki fæðinguna af.

Mæðrahúsið í Bluefields í Níkaragúa í Mið-Ameríku er eitt af fimm mæðrahúsum sem Þróunarsamvinnustofnun Íslands hefur látið byggja og var það opnað fyrir skömmu. Þar dvelja verðandi mæður sem fá aðgang að læknisþjónustu á meðgöngutímanum.

Mæðradauði er mjög algengur í Níkaragúa og eru 56 mæðrahús starfandi þar í landi. Fyrir örfáum dögum dvaldi þar níu ára barnshafandi stúlka sem var nauðgað af frænda sínum. Hún er gengin fimm mánuði á leið og hefur verið komið fyrir á stofnun þar sem hún fær fulla læknisþjónustu. Yfirvöld í Níkagúa hafa reynt að að halda nafni stúlkunnar leyndu.

Gerður Gestsdóttir ráðgjafi hjá Þróunarsamvinnustofnun Íslands í Managúa höfuðborg Níkaragúa segir miklar líkur á að stúlkan lifi ekki fæðinguna af þrátt fyrir að vera með teymi sérfræðinga og lækna.

Læknar óttast að hún hafi hvorki líkamlega né andlega burði til að eiga það. Fóstureyðingar í landinu voru bannaðar í landinu í fyrra og er hún því tilneydd að eiga barnið.

Málið komst í hámæli þegar móðir hennar kærði nauðgunina til yfirvalda í Bluefields og hefur það vakið hörð viðbrögð þar í landi. Áður hafði hún tilkynnt atburðinn til lögreglunnar í heimabæ sínum í maí en þar fékk málið ekki hljómgrunn.