Tjónið á Norðurbrú eftir mótmælin nemur tugum milljóna

Aðfaranótt sunnudagsins komu um eitt þúsund ungmenni saman á Norðurbrú til að mótmæla því að rúmlega hálft ár var liðið frá því Ungdómshúsið var rifið. Ungmennin hafa krafist þess að byggt yrði annað hús en borgaryfirvöld hafa ekki orðið við því. Frá því borgaryfirvöld ákváðu að rífa Ungdómshúsið í fyrra hefur Norðurbrú breyst í stríðsvöll í fjölmörg skipti, þar sem hundruð ungmenna hafa verið handtekin. Laugardagsnóttin var engin undantekning og voru sumir mótmælendanna allt að fimmtán og sextán ára gamlir.

Sextíu og fjórir voru handteknir aðfaranótt sunnudagins og fjórir leiddir fyrir dómara í gær. Nú sitja þrír mótmælendur í fangelsi og voru þeir dæmdir í tuttugu og fimm daga fangelsi. Hinum var sleppt. Það var ekki sjón að sjá Norðurbrú eftir laugardagsnóttina og var eyðileggingin mikil. Mótmælendurnir kveiktu í húsum, brutu rúður og rændu vörum úr verslunum.

Eignatjónið er gríðarlegt og er það talið nema tugum milljóna króna. Innréttingar í verslunum og veitingastöðum voru víða gjöreyðilagðar og verslunarvörum stolið fyrir hundruð þúsunda. Verslunar og veitingahúsaeigendur eru orðnir langþreyttir á þessu ástandi sem endurtekur sig með nokkurra mánaða millibili.