Íslendingur aðstoðaði við björgunarstörf

Íslendingur búsettur í Minneapolis var sjónarvottur að því þegar átta akreina brú í Minnesota hrundi á háannatíma. Að minnsta kosti sjö létust í slysinu og um 20 er saknað. Íslendingurinn, Einar Guðjónsson, segir á athugasemdakerfi Vísis að hann hafi nánast séð brúna hrynja í baksýnisspeglinum örfáum mínútum eftir að hann hafði sjálfur keyrt eftir henni.

„Ég keyrði þarna yfir aðeins nokkrum mínútum áður en brúin hrundi, sá hana nánast hrynja í baksýnisspeglinum," segir Einar meðal annars. „Snéri við til að bjóða aðstoð, en þetta var hrikalegt, fólk slasað, fast í bílunum, fast undir brúar- og stálbitum, 7 látnir þegar ég yfirgaf svæðið."

Einar segir að þegar hann hafi ekið eftir brúnni hafi hann einmitt verið að hugsa um hvort að brúin myndi þola þyngslin á henni því fyrir utan venjulega umferð hafi verið mikið af þungavinnuvélum á brúnni. Þegar Einar sá brúna hrynja segist hann hafa snúið þegar við og hafist handa við að bjarga fólki. „Eina góða sem gerðist var að mér og tveimur öðrum tókst að bjarga konu og dóttur hennar úr bíl í vatninu, náði svo manni úr bíl næst hennar, en hann var því miður látinn áður en við komum honum á þurrt land."

„Það verða gífurlega margir sem koma til með að eiga erfitt eftir þetta hörmulega slys," segir Einar Guðjónsson að lokum í færslunni.

Viðtalið við Einar Guðjónsson í heild sinni