Lögregla telur morðið á Sæbraut upplýst

Lögreglan telur að morð á 35 ára gömlum manni á Sæbraut í Reykjavík í gær sé upplýst. Engu að síður er fjöldi þátta afar óljós sem tengist atburðarásinni og heldur lögreglan því áfram rannsókn sinni.

Eftir að maðurinn varð fyrir skotinu á Sæbrautinni flýði hann upp í sendiferðabíl sem átti leið hjá en þegar ökumaður þess bíls kom að var árásarmaðurinn á staðnum með morðvopnið í höndunum.

Ökumaður sendibílsins lagði því á flótta og hann stöðvaði bíl sinn við sundlaugarnar í Laugardal til að leita hjálpar. Haft er eftir bílstjóranum í Fréttablaðinu í dag að ekki hefði séð á manninum þegar hann kom upp í sendibílinn en "svo fór blóðið að fossa úr honum í stríðum straumum," segir Eiríkur Eiðsson sendibílstjóri í samtali við Fréttablaðið.

Að sögn læknis á bráðadeild sjúkrahússins í Fossvogi fór kúlan í gegnum brjóstholið við hægra lungað og lífgunartilraunir báru ekki árangur.

Eftir skotárásina ók árásarmaðurinn til Þingvalla þar sem hann tók líf sitt með sama vopni og hann notaði við árásina á Sæbrautinni. Árásarmaðurinn skildi eftir sig bréf til lögreglu en hún hefur ekki gefið upp innihald þess. Lögreglan lýsti því yfir í gær að um harmleik væri að ræða en hinn myrti hafði átt í sambandi við fyrrverandi eiginkonu þess sem framdi voðaverkið. Í DV í dag er fullyrt að árásarmaðurinn hafi meðal annars verið illa haldinn af svefnleysi og djúpu þunglyndi vegna skilnaðarins.