Enginn hvalkvóti gefinn út

Ekkert er gert ráð fyrir neinum hvalveiðum í nýrri reglugerð sjávarútvegsráðherra um leyfilegan heildarafla á næsta fiskveiðiári. Stjórnvöld ætla ekki að gefa út hvalkvóta fyrir næsta fiskveiðiár fyrr en ljóst verður með sölu á kjötinu. LÍÚ vill að hvalveiðar verði áfram leyfðar burtséð frá sölu þar sem hvalurinn éti mikið af æti þorsksins.

Sjávarútvegsráðherra kynnti í ráðherrabústaðnum síðastliðinn fimmtudag reglugerð um leyfilegan heildarafla á næsta fiskveiðiári. Í reglugerðinni er ekki gefinn út neinn kvóti vegna hvalveiða. Hvalveiðar í atvinnuskyni hófust að nýju eftir tæplega tveggja áratuga hlé í október í fyrra.

Viðræður hafa staðið yfir við japönsk stjórnvöld vegna sölu á kjötinu þangað en ekki er ljóst hvort og þá hvenær salan getur hafist. Sjávarútvegsráðherra hefur sagt opinberlega að ekki verði tekin ákvörðun um framhald veiðanna fyrr en ljóst er hvort kjötið seljist. Ef kjötið selst ekki þá verði veiðunum sjálfhætt.

Landssamband íslenskra útvegsmanna sendi frá sér tillögur í síðustu viku þar sem lagt var til að hvalveiðar yrðu stórauknar. Helstu hvalastofnar við landið eru stórir og samkvæmt rannsóknum Hafrannsóknastofnunarinnar hafa hvalir töluverð áhrif á stærð helstu nytjastofna. LÍÚ vill að hvalveiðar verði áfram leyfðar burtséð frá sölu á kjötinu þar sem hvalurinn éti mikið æti frá þorsknum.