Þúsundir hermanna leita að félögum sínum

Hópur með tengsl við Al Kaída samtökin hefur í yfirlýsingu sagst vera með þrjá bandaríska hermenn í haldi í Írak. Þúsundir bandarískra og íraskra hermanna leita nú að mönnunum sem hurfu eftir að sveit þeirra lenti í fyrirsát í úthverfi Baghdad á laugardag. Fimm bandarískir hermenn féllu í árásinni.

Hópurinn sem kallar sig Íslamskt ríki í Írak, kom yfirlýsingunni á framfæri á vefsíðu þar sem þeir sögðust vera með „krossfara" í haldi, en það er nafn sem uppreisnarmenn í Írak gefa bandarískum hermönnum. Árásin átti sér stað á sömu slóðum og tveimur hermönnum var rænt á síðasta ári. Limlest lík þeirra fundust skömmu síðar.