Aðstæður til leitar erfiðar

Óttast er um afdrif rúmlega eitthundrað farþega sem voru um borð í flugvél sem hrapaði í Kamerún í morgun. Aðstæður til leitar eru erfiðar og ekki hefur enn tekist að finna flugvélina.

Skömmu eftir að flugvélin tók á loft frá Douala í Kamerún áleiðis til Nairobi höfuðborgar Kenýu í morgun sendi hún frá sér neyðarkall. Samband við hana rofnaði skömmu síðar. Flugvélin er af gerðinni Boeing 737-800. Eitt hundrað og fjórtán manns voru um borð en flugvélin er í eigu Kenya Airways. Talið er að flugvélin hafi hrapað í regnskógum nærri bænum Lolodorf en íbúar þar segjast hafa heyrt mikla sprengingu um svipað leyti og samband við flugvélina rofnaði. Yfirvöld í Kamerún hafa litlar upplýsingar getað veitt um slysið en aðstæður til leitar eru erfiðar.