Komu í veg fyrir atkvæðagreiðslu um vantraust á Olmert

Benjamin Netanyahu, leiðtogi stjórnarandstöðunnar á ísraelska þinginu, fór í dag fram á það að Ehud Olmert segið af sér vegna nýbirtrar skýrslu um stríð Ísraela og Hizbollah í Líbanon.

Deilt var um skýrsluna á sérstökum þingfundi í Knesset, ísraelska þinginu, þar sem Netanyahu bar fram kröfuna. Félagar Olmerts í Kadima-flokknum lýstu hins vegar yfir stuðningi við Olmert og því kom ekki til atkvæðagreiðslu um vantrauststillögu á hendur forsætisráðherranum.

Í skýrslunni um stríðið er Olmert harðlega gagnrýndur fyrir alvarleg mistök í stríðinu en hann hefur neitað því að segja af sér þrátt fyrir hvatningu þess efnis frá flokkssystur sinni, utanríkisráðherranum Tzipi Livni.

Þá benda skoðanakannanir til þess að meirihluti Ísraela vilji að Olmert segi af sér og var búist við mótmælum í Tel Aviv í dag vegna afstöðu forsætisráðherrans.