Le Pen hvetur stuðningsmenn sína til að sniðganga forsetakosningarnar

Jean-Marie Le Pen, leiðtogi Þjóðfylkingarinnar flokks franskra hægri öfgamanna, hvatti flokksmenn sína í dag til sniðganga seinni umferð frönsku forsetakosninganna. Le Pen hafnaði í fjórða sæti í fyrri umferðinni með 3,8 milljónir atkvæða.

Í ræðu sinni í dag fyrir framan þúsundir stuðningsmanna réðst Le Pen harkalega að Sarkozy, sigurvegara fyrri umferðarinnar og frambjóðanda hægrimanna. Le Pen sagði að Sarkozy hefði stolið ýmsum af sínum áhersluatriðum í kosningabaráttunni sérstaklega þeim er snúa að innflytjendum og franskri þjóðerniskennd. „Ég hvet stuðningsmenn mína til kjósa hvorki Royal né Sarkozy í komandi kosningum," sagði Le Pen.

Skoðanakönnun sem gerð var í gær sýndi að 89 prósent af stuðningsmönnum Le Pen styðja Sarkozy í seinni umferðinni. Fari svo að meirihluti flokksmanna sniðgangi seinni umferðinar eða skili auðu er ljóst að það er fyrst og fremst Sarkozy sem mun skaðast.