Yfirvöld sökuð um að hafa brugðist of hægt við

Yfirvöld í Blacksburg í Virginíu liggja nú undir miklu ámæli fyrir að hafa ekki brugðist nægilega hratt við þegar vopnaður maður skaut 32 nemendur og kennara í háskóla í borginni til bana í gær. Upplýst hefur verið að maðurinn var sjálfur nemandi við skólann og af asísku bergi brotinn.

Nemendur og starfsfólk Virginia Tech-háskólans eru að vonum enn í algeru losti eftir þessa verstu skotárás í sögu Bandaríkjanna en minningarathafnir um þá 32 sem létu lífið í þessu hörmulega blóðbaði voru haldnar í gærkvöld.

En samhliða sorginni hefur mikil reiði gripið um sig svo og undrun á hvernig fjöldamorðin gátu átt sér stað. Nú er orðið ljóst að árásirnar tvær urðu með með tveggja klukkustunda millibili og í síðari árásinni féll stærsti hluti fórnarlambanna eða þrjátíu manns. Eftirlifendur vilja fá að vita hvers vegna yfirvöld brugðust ekki strax við eftir fyrri árásina með því að loka skólanum og veita nemendunum tilhlýðilega vernd.

Stór hluti nemendanna fékk engar viðvaranir fyrr en tölvupóstur var sendur út tveimur klukkutímum eftir fyrri árásina. Rektor skólans afsakaði sig hins vegar á blaðamannafundi í gær með því að segja að skólayfirvöld hefðu enga hugmynd haft um hversu alvarlegt málið væri.

Í morgun var greint frá því að árásarmaðurinn hafi verið nemandi við skólann sem bjó á heimavistinni og af asísku bergi brotnu. Það kemur heim og saman við lýsingar sjónarvotta sem segja hann hafa virst þekkja vel til á svæðinu. Lögreglan hefur hins vegar enn ekki viljað útiloka að morðinginn hafi átt sér vitorðsmann, en tvær byssur fundust á vettvangi ódæðanna í gær.

Að vonum hefur vart verið um annað fjallað í Bandaríkjunum undanfarinn sólarhring. George Bush, forseti landsins, sagði í ávarp sínu í gær að gervöll þjóðin væri miður sín og allt yrði gert til að aðstoða heimamenn í Blacksburg við rannsóknina.