Páfi valtar yfir Da Vinci skjölin

Benedikt Páfi hefur sent frá sér sína fyrstu bók eftir að hann tók við því embætti og nefnist hún Jesús frá Nazaret. Í henni vísar hann óbeint á bug vangaveltum um líf Krists eins og komu fram í metsölubókinni Da Vinci skjölin. Bókin er sögð vera persónuleg leit hans að ásjónu Krists.

Benedikt segir að í bókinni reyni hann að kynna Jesús guðspjallanna sem hinn raunverulega Jesús og hinn sagnfræðilega Jesús eins og hann var og lifði í raun og sannleika. Páfi segir; "Já, það gerðist. Jesús er ekki mýta. Hann var maður af holdi og blóði, algjörlega raunveruleg nærvera í sögunni. Hann dó og reis upp frá dauðum."

Christof Schonborn, kardináli, sem kynnti bókina fyrir hönd Benedikts sagði að hún byggði á hinni traustu, sögulegu ábyrgð guðspjallanna. Asnalegar vangaveltur um Krist sem byltingarmann eða leynilegan elskhuga Maríu Magdalenu, ættu heima í ruslageymslu sögunnar.