Staða Jústsjenkós versnar

Viktor Janukovits, forsætisráðherra Úkraínu, hótaði í dag að sniðganga kosningarnar sem Viktor Jústsjenkó, forseti landsins, boðaði til í fyrrakvöld. Þúsundir stuðningsmanna þessara fornu fjenda fylktu liði í höfuðborginni Kænugarði í dag. Ekki kom til neinna átaka á milli fylkinganna þótt þær hafi mæst enda hafði lögregla uppi mikinn viðbúnað. Staða Jústsjenkós er sögð hafa veikst mikið á undanförnum mánuðum þar sem þær umbætur sem hann hefur boðað láta á sér standa. Fjölmargir þingmenn úr hans röðum hafa gengið til liðs við Janukovits og því ákvað hann að rjúfa þing og efna til kosninga.