Ferguson: Við verðum að stöðva Totti

Sir Alex Ferguson, stjóri Manchester United, segir að hans menn verði að finna leið til að halda aftur af Francesco Totti ef þeir ætli sér að leggja Roma í Meistaradeildinni annað kvöld. Þetta er fyrri leikur liðanna í 8-liða úrslitunum og verður hann að sjálfssögðu sýndur beint á Sýn klukkan 18:30.

"Totti er arkitektinn á bak við allt sem þetta lið gerir og því verðum við að finna leið til að eiga við hann. Við munum ekki vanmeta verkefnið, því Roma er eitt erfiðasta liðið viðureignar í keppninni. Við megum ekki láta Totti leika lausum hala og ég á eftir að gera það upp við mig hvort ég læt miðverðina eiga við hann eða hvað ég geri.

Við berum mikla virðingu fyrir Roma. Liðið sló Lyon úr keppni og fyrirfram átti ég von á því að Lyon yrði eitt þeirra liða sem færu hvað lengst í keppninni í ár. Roma fékk ekki á sig mark í leikjunum tveimur og það segir sína sögu um styrk þeirra," sagði Ferguson.