1861 óbreyttur borgari fórst í átökum í Írak í mars

1861 óbreyttur borgari fórst í árásum og átökum í Írak í nýliðnum marsmánuði. Það er 13 prósenta aukning frá því í febrúar þegar 1645 fórust. Þetta eru opinberar tölur frá ríkisstjórn Íraks. Mannskæðasta einstaka árás uppreisnarmanna frá upphafi stríðsins var á miðvikudaginn þegar 165 fórust í borginni Tal Afar.

Svo virðist sem stórhertar öryggisráðstafanir í landinu sem innleiddar voru í byrjun mars séu enn ekki farnar að skila tilætluðum árangri, að minnsta kosti styðja þessar tölur ekki þá fullyrðingu sendiherra Bandaríkjanna í Írak um að ofbeldi hafi minnkað um fjórðung frá því að öryggisáætlunin tók gildi.

Rúm fjögur ár eru frá því að Bandaríkjamenn og bandamenn þeirra réðust inn í Írak og í maí verða fjögur ár síðan Bush Bandaríkjaforseti lýsti yfir fullnaðarsigri. Samkvæmt opinberum tölum hafa yfir 60 þúsund farist frá byrjun stríðsins en þó hafa heyrst margfalt hærri tölur.