Þyrla sótti slasaðan mann við Vík í Mýrdal

Þyrla Landhelgisgæslunnar var kölluð út í dag vegna manns sem slasaðist þegar bíll hans fauk út af veginum fyrir ofan Vík í Mýrdal. Að sögn lögreglunnar á Hvolsvelli var tilkynnt um slysið um eittleytið í dag og var ákveðið að kalla til þyrlu eftir að maðurinn kenndi eymsla í baki.

Hins vegar var veður svo slæmt á slysstað að þyrlan komst ekki þangað og því þurfti að flytja hann til móts við hana til Hvolsvallar. Hann gengst nú undir rannsókn á slysadeild Landspítalans í Fossvogi en er að sögn læknis ekki í lífshættu. Lögregla á Hvolsvelli segir snarvitlaust veður hafa verið frá Eyjafjöllum og austur að Höfn framan af degi og enn mun vera mjög hvasst í Öræfasveit og ekkert ferðaveður þar.