Vegur um Arnkötludal boðinn út á næstu dögum

Vegur um Arnkötludal á milli Steingrímsfjarðar og Gilsfjarðar verður boðinn út á næstu dögunm og stefnt er að því að hann verði tilbúinn undir lok næsta árs. Þetta kom fram í máli Sturlu Böðvarssonar samgönguráðherra á fundi um samgöngu- og fjarskiptamál á Hólmavík í gærkvöld.

Þar kom enn fremur fram að nýlega hefði verið boðinn út fyrri hluti GSM-farsímakerfisins á Hringveginum þar sem þjónusta hefur ekki verið fyrir hendi. Fram kemur á vef ráðuneytisins að útboð á útsendingum á Ríkissjónvarpinu í gegnum gervihnött hafi þegar farið fram en með því eiga útsendingar Ríkissjónvarpsins að ná bæði til sjómanna og þeirra sem hingað til hafa ekki notið útsendinga Sjónvarpsins.