Tvær sýningar verða opnaðar í gallerí Kling & Bang í dag. Spænski listamaðurinn Alejandro Vidal heldur sína fyrstu einkasýningu hér á landi og sýnir myndbandsverk og ljósmyndir í afgirtu rými en í galleríinu gefur einnig að líta vídeóverk þýska listamannsins Johns Bock.
Bock starfaði náið með aðstandendum Kling & Bang gallerísins árið 2005 þegar hann gerði myndina Skipholt en hún var sýnd á Listahátíð sama ár. Í tilkynningu um mynd Bocks, Stúlka með klettasalati, er vísað til þess að listamanninum hafi verið fjarstýrt af yfirnáttúrulegum öflum og líkami stúlkunnar í myndinni hafi því verið þvingaður til svívirðilegra athafna. Þannig hafi líkami fórnarlambsins verið afbyggður, teikningum komið fyrir á honum og á honum gerð ýmis próf og greiningar. Atriði í fyrrgreindri mynd eru ekki við hæfi barna.
Sýningarnar tvær standa til 13. maí en galleríið er opið fimmtudaga til sunnudaga frá kl. 14-18.
