Innfæddur ameríkani í stað indíána?

Svo gæti farið að orð eins og indíáni, eskimói, dvergur og mongólíti verði bannorð í Noregi ef marka má frétt á vef norska ríkisútvarpsins.

Þar er sagt frá því að norska málnefndin hafi ásamt umboðsmanni jafnréttismála fundað að undanförnu með það að markmiði að búa til lista yfir orð sem þau telja að Norðmenn eigi að fara varlega í að nota þar sem þau geti verið særandi.

Rætt er við norskan rithöfund og málvísindamann sem bendir á að indíánar séu ekki lengur kallaðir indíánar í Bandaríkjunum heldur innfæddir ameríkanar. Telur rithöfundurinn að orðið indíáni hverfi brátt úr norsku líkt og orðin negri og hottintotti sem þegar hafa verið sett á bannlista í Noregi.

Ekki eru þó allir sáttir við slíka pólitíska rétthugsun og haft er eftir nefndarmanni í norsku málnefndinni að mikilvægt sé að hafa fjölbreytni í málinu. Það leysi engin samfélagsleg vandamál að banna orð.