Draga úr leit að Steve Fossett

Yfirvöld í Nevada fylki í Bandaríkjunum hafa ákveðið að draga verulega úr leit að ævintýramanninum og auðjöfrinum Steve Fossett. Aðeins tvær flugvélar voru við leitarstörf í dag en í síðustu viku voru þær tuttugu talsins. Steve Fosset hefur nú verið saknað í tvær vikur.

Fjölmargir hafa tekið þátt í leitinni að Steve Fossett en ekkert hefur til hans spurt síðan hann tók á loft á eins hreyfils vél sinni frá flugvelli í Nevada þann 3. september síðastliðinn. Þegar mest var voru yfir 25 vélar við leitarstörf ásamt björgunarsveitum á jörðu niðri. Hingað til hefur leitinn ekki borið neinn árangur.

Samkvæmt yfirmanni almannavarna í Nevada fylki verður ákveðið á miðvikudaginn hvort leitinni verður haldið áfram. Hann sagði þó að björgunarsveitir sem og þyrlur bandaríska heimavarnarliðsins yrðu áfram til reiðu til að fylgja eftir öllum mögulegum vísbendingum.