Dráttur á of miklum hraða

Bíll sem var með annan bíl í togi var stöðvaður á 105 kílómetra hraða á klukkustund á Vesturlandsvegi í umdæmi Akraneslögreglunnar í gær. Lögreglan á Akranesi vekur athygli á því að við þessar aðstæður gildir ekki reglan um 90 kílómetra hámarkshraða heldur má bíll sem dregur annan bíl með taug aðeins aka á 30 kílómetra hraða. Ökumaður dráttarbílsins var því sviptur ökuleyfi á staðnum enda var hann 75 kílómetrum yfir hámarkshraða. Þegar ökutæki er dregið af öðru ökutæki með stöng eða öðrum viðurkenndum björgunarbúnaði má aka á allt að 50 kílómetra hraða.