Kostnaður við skemmdir minnst 150 milljónir

Mótmæli undanfarinna daga í Kaupmannahöfn kosta hið opinbera minnst 150 milljónir króna. Ritt Bjerregaard borgarstjóri Kaupmannahafnar mótmælendur hafa fyrirgert rétti sínum til að fá nýtt hús. Ungdomshuset á Jagtvej verður rifið.

Umfang skemmdanna er margfalt það sem borgaryfirvöld hafa áður séð, en eftir mótmæli og slagsmál lögreglu og mótmælenda í desember voru skemmdir til samanburðar metnar á tvær milljónir. Kostnaður borgarinnar nú bara við hreinsun borgarinnar verður líklega nærri 20 milljónum króna, meðal annars vegna þess að víða þarf að malbika upp á nýtt eftir stóra götubruna.

Stærsti kostnaðarliður hins opinbera er hinsvegar laun lögreglumanna, en næstum má fullyrða að hver einasti lögreglumaður í Kaupmannahöfn hafi unnið marga yfirvinnutíma, með nætur- og helgarálagi síðustu daga. Kostnaðurinn við það eitt fer nærri 70 milljónum króna. Þá þarf að greiða hótelreikninga og uppihald fyrir þá lögreglumenn sem komu annars staðar frá til að vera Kaupmannahafnarlögreglunni til halds og trausts.

Þá þurfa tryggingafélög að greiða nærri 25 milljónum króna til eigenda bíla sem brenndir voru í götubardögum. Þá á eftir að telja þann skaða sem verslanaeigendur á Norðubrú hafa orðið fyrir, bara skemmdir á eigum þeirra nema um 60 milljónum króna.

Ritt Bjerregaard borgarstjóri Kaupmannahafnar segir ungmennin hafa með skemmdarverkum sínum fyrirgert sér réttinum til að fá nýtt hús til afnota, en það hafði borgin margoft boðið þeim á meðan leitað var friðsamlegra lausna á deilunni um Ungdomshuset.

Hún segir með öllu ótækt að ofbeldið verði launað með slíkum hætti. Styrktarsjóður Ungdomshusset upplýsti í gær að til væru nægilegir fjármunir til að kaupa nýtt hús, en lögmaður félagsins sagðist óttast að erfitt yrði að sannfæra væntanlega nágranna um að óhætt sé að sjá starfsemina í friði eftir atburði undanfarinna daga.

Politiken greinir svo frá því á vef sínum í morgun að stórvirkar vinnuvélar séu komnar fyrir utan Ungdomshuset á Jagtvej og allt virðist tilbúið til að hefja niðurrif hússins.

Faderhuset-trúarsöfnuðurinn sem á húsið hefur ekki greint opinberlega frá ákvörðun sinni um framtíð hússins en ætla að gera það á blaðamannafundi sem hefst klukkan níu þennan morguninn. Politiken fullyrti í gær að það væri lögnu ákveðið að rífa húsið.