Offita vaxandi vandamál í Evrópu

Samkvæmt þeim rannsóknum sem kynntar voru á ráðstefnunni í Búdapest glímir rúmlega einn milljarður manna við offitu í heiminum öllum og þar af 312 milljónir við meiriháttar offitu. Miðað við þróun undanfarinna ára er talið að offita geti orðið að meiriháttar heilbrigðisvandamáli innan fárra ára.

Samkvæmt breskri rannsókn sem kynnt var á ráðstefnunni teljast 30 prósent allra breskra barna vera of feit í dag. Þetta er talið vera sérstakt áhyggjuefni því rannsóknir benda ennfremur til þess að 80 prósent þeirra sem glíma við offitu í æsku muni halda áfram að glíma við vandamálið á fullorðinsárum. Í dag er talið að vandamál tengd offitu kosti bresku þjóðina um eitt þúsund milljarða króna á ári.