Hjartavernd tekur í notkun nýjan hjartarita

Hjartavernd hefur tekið í notkun nýjan og fullkominn hjartarita sem keyptur var fyrir áheitafé sem safnaðist í Reykjavíkurmaraþoni Glitnis í ágúst síðastliðnum.

Um 800 þúsund krónur komu í hlut Hjartaverndar þegar áheit voru gerð upp eftir Reykjavíkurmaraþon Glitnis en um tugur starfsmanna bankans sem tók þátt í hlaupinu hét á samtökin.

Fram kemur í tilkynningu frá Hjartavernd að ritinn komi að góðum notum við greiningu og rannsóknir en hjartalínurit er ein einfaldasta leiðin til að greina vísbendingar um kransæðasjúkdóm og hjartsláttartruflanir.