Lugovoj segist hafa sannanir fyrir sakleysi sínu

Andrei Lugovoj, fyrrverandi njósnari hjá KGB, neitar því að hafa hafa orðið fyrrverandi félaga sínum, Alexander Litvinenko, að bana og segir ákæru sem bresk stjórnvöld hafa gefið út í málinu eiga sér pólitískar rætur.

Eins og kunnugt er lést Litvinenko, sem einnig er fyrrverandi njósnari hjá KGB, í Lundúnum í nóvember í fyrra eftir að eitrað hafði verið fyrir honum með geislavirka efninu pólon 210. Hefur breska lögreglan rannsakað málið og greindi í morgun frá því að Lugovoj yrði ákærður í málinu, en þeir Litvinenko hittust daginn sem Litvinenko veiktist.

Í samtali við fréttamenn í Moskvu í dag hló Lugovoj að ásökununum og sagðist hafa sannanir fyrir sakleysi sínu. Í sama streng hafa ráðamenn í Moskvu tekið og neita að framselja Lugovoj til Bretlands enda er enginn framsalssamfningur á milli landanna.

Litvinenko hélt því fram á dánarbeði sínum að rússnesk stjórnvöld hefðu staðið á bak við tilræðið á hendur sér en hann er svarinn andstæðingur Pútíns Rússlandsforseta. Því hafa rússnesk stjórnvöld algjörlega hafnað.