Útivistarreglur breytast á morgun

Lögreglan á höfuðborgarsvæðinu vekur athygli foreldra á því að frá og með morgundeginum breytist útviststartími barna. Frá þeim tíma mega 12 ára börn og yngri vera úti til klukkan 20 en 13 til 16 ára unglingar mega vera úti til klukkan 22.

Lögregla segir að bregða megi út af reglunum fyrir síðartalda hópinn þegar unglingar eru á heimleið frá viðurkenndri skóla-, íþrótta- eða æskulýðssamkomu.

Útivistarreglurnar eru samkvæmt barnaverndarlögum. Þeim er meðal annars ætlað að tryggja nægan svefn en hann er börnum og unglingum nauðsynlegur að sögn lögreglu. Svefnþörfin er einstaklingsbundin en þó má ætla að börn og unglingar á grunnskólaaldri þurfi 10 tíma svefn á nóttu. Segir lögregla mikilvægt að fylgja því eftir að börn og unglingar fái nægan svefn.