Yfirvöld á Akureyri hvött til afsagnar

Hafin er undirskriftasöfnun á meðal bæjarbúa á Akureyri þar sem Bæjarstjórinn, Sigríður Björk Jakobsdóttir, er hvött til að segja af sér. Einnig er skorað á meirihlutann eins og hann leggur sig að gera slíkt hið sama. Undirskriftalistanum er ýtt úr vör í kjölfar umdeildrar ákvörðunar bæjaryfirvalda að banna ungmennum á aldrinum 18 til 23 ára að tjalda í bænum yfir verslunarmannahelgina.

Banni skellt á með skömmum fyrirvara

Birgir Torfason, meðlimur í Vinum Akureyrar, stendur fyrir listanum. Hann gagnrýnir bæjarstjórann og meirihlutann harðlega í samtali við Vísi og segir þau vanhæf til að gegna störfum sínum. „Við höfum alltaf staðið í stappi við bæjaryfirvöld vegna þessarar hátíðar um verslunarmannahelgina og sniðið hana að þeirra kröfum hverju sinni," segir Birgir. Hann segir málin þó hafa versnað til muna með tilkomu nýs meirihluta í bænum. „Í júní lofuðu þeir okkur að tjaldsvæðamálin yrðu í lagi. Þar yrði aðeins 18 ára aldurstakmark sem er eðlilegt að okkar mati." Hann segir að þetta loforð hafi síðan verið svikið með afar stuttum fyrirvara en tilkynnt var um bannið á mánudaginn fyrir viku síðan, aðeins nokkrum dögum fyrir hátíðina.

Hátíðin ónýt

„Við lítum svo á að með þessari ákvörðun hafi mótshaldarar í raun setið uppi með ónýta hátíð," segir Birgir. Hann segir að allur undirbúningur verslunarmanna á svæðinu hafi miðað að því að þessi aldurshópur væri velkominn til bæjarins. Hann tekur einnig dæmi af kynningarbæklingi sem prentaður hafi verið í 50 þúsund eintökum og dreift um allt land. Þar hafi staðið skýrum stöfum að aldurstakmarkið væri 18 ár. Birgir segist álíta að tjón vegna þessarar ákvörðunar hlaupi á tugum milljóna króna.

Ætlar að opna bloggsíðu

Aðspurður segir Birgir söfnun undirskrifta ganga vel og að hann áformi að koma bloggsíðu í loftið í kvöld eða á morgun. „Ég ætla síðan að reyna að koma listanum til bæjarstjórnarinnar á föstudaginn kemur." Hann segist ennfremur trúa því og vona að einhver utanbæjarmaður kæri bannið á grundvelli almennra mannréttinda.

Tjaldsvæðið rekið eins og fangelsi

Birgir er ennfremur ósáttur við fyrirkomulag það sem í gildi sé um tjaldsvæði bæjarins en skátarnir hafa þann rekstur með höndum. „Mér finnst að það eigi að bjóða þennan rekstur út á meðal einkaaðila því skátarnir eru engan veginn að gera þetta á viðunandi hátt." Birgir segir að reglur skátanna á svæðinu séu alltof strangar og tekur dæmi af síðustu helgi. „Þeir reka þetta bara eins og fangelsi og um helgina var í gildi heimsóknarbann á tjaldsvæðinu eftir klukkan tólf." Birgir segir að lokum að ekki sé útséð með hvort farið verði í skaðabótamál við bæinn, en að það komi til greina.