Ný og betri Júniformverslun

Fatahönnuðurinn Birta Björnsdóttir, eigandi Júníform, hefur staðið í ströngu síðustu vikuna við að rífa allt út úr verslun sinni á Hverfisgötu. „Það var bara löngu kominn tími á þetta. Þegar við byrjuðum að sauma hérna var allt gert til bráðabirgða, svo það var löngu kominn tími til að rífa allt út og endurnýja," sagði Birta í samtali við Fréttablaðið.

Birta flutti inn á Hverfisgötuna ásamt Andreu Magnúsdóttur, sem þá var annar eigandi Júniform, árið 2002. „Þá var ekki einu sinni planið að opna búð hérna. Þetta átti bara að vera verkstæði fyrir tvær stelpur að leika sér, en varð búð áður en við vissum af," sagði Birta.

Velgengni fatamerkisins hefur verið afar mikil, og þess er skemmst að minnast að allar flíkur í versluninni seldust upp í kjölfar þess að Ragnhildur Steinunn Jónsdóttir kynnti Eurovision-keppnina í fötum frá Birtu.

Júniform opnar aftur á mánudag, þá full af nýjum vörum. „Ég var með lokað í eina viku, og við erum búin að vera nokkur í því að tæta og trylla. Nú stend ég í nýrri, æðislegri búð," sagði Birta ánægð.