Dönsk hönnun og stíliseruð íþróttaföt

Danska tískumerkið Wood Wood sýndi sumarlínu sína fyrir árið 2008 á tískuvikunni í Kaupmannahöfn ásamt íþróttamerkinu Adidas sem einnig kynnti nýjustu línu sína. Hönnuðir Wood Wood hafa áður unnið með Adidas og hönnuðu eitt sinn strigaskó undir merkinu.

 

Hönnun Wood Wood svipar svolítið til íþróttafatnaðs og sennilega er merkið þekktast fyrir hettupeysur með litríku prenti og skemmtilegu mynstri. Smám saman hafa hönnuðirnir þó leitað í fjölbreyttari hluti og hanna nú heilu línurnar fyrir stúlkur og stráka.

Í þessari línu mátti sjá fallega pastelliti og skemmtileg snið sem sum hver minntu örlítið á brimbrettastíl í bland við klassískari línur.

Adidas sýndi skemmtilegar útfæringar á íþróttafatnaði með örlítið bjöguðu Adidas-merki á sumum flíkum. 

Hermannaklæði virtust vera hönnuðum Adidas hugleikin því margar fyrirsæturnar klæddust skemmtilegri blöndu af hermannaklæðum og íþróttafatnaði.