Spurningakeppni sveitarfélaga endurvakin í haust

„Þetta er rétt, við verðum með þessa keppni og hún hefst 14. september,“ segir Þórhallur Gunnarsson, dagskrárstjóri RÚV ohf., en Sjónvarpið hyggst endurvekja spurningakeppni milli 24 stærstu sveitarfélaga landsins. Ómar Ragnarsson stýrði samskonar þætti sem hét Hvað heldurðu í Sjónvarpinu seint á níunda áratugnum. Þegar Ómar færði sig yfir á Stöð 2 hélt hann uppteknum hætti en þá hét þátturinn Landsleikurinn. Í þáttum Ómars sló meðal annars ritstjórinn Illugi Jökulsson rækilega í gegn þegar hann lagði hvern keppinautinn af fætum öðrum í eltingarleik að bjöllunni góðu.

Þórhallur vildi ekki gefa upp hverjir myndu sjá um stjórn þáttarins. Hann útilokaði þó að Ómar Ragnarsson myndi endurtaka leikinn. Dagskrárstjórinn reiknaði hins vegar fastlega með því að þátturinn yrði kynntur fyrir starfsmönnum og svo landsmönnum öllum í ágúst þegar flestir væru snúnir til baka eftir sumarfrí.

Aðspurður hvort hvert sveitarfélag yrði síðan með skemmtiatriði sagði Þórhallur svo vera. „En fyrst og fremst verður þetta spurningakeppni sveitarfélaganna og barátta þeirra um hvert þeirra sé skemmtilegast og gáfaðast.“

Reykjanesbær hefur augljóslega tekið forystu í þessum málum því á vef Víkurfrétta kemur fram að menningarfulltrúinn auglýsir eftir fólki til að skipa hið þriggja manna lið. Reiknað er með að einn „frægur“ frá bæjarfélaginu taki þátt í keppninni en það getur verið söngvari, leikari eða bara stolt bæjarins.

Þetta verður því þriðja spurningakeppnin sem landsmönnum gefst kostur á að sjá í haust. Fyrir eru Meistari Loga Bergmann á Stöð 2 sem fastlega má gera ráð fyrir að snúi aftur á skjáinn og svo auðvitað Gettu betur þar sem menntskælingar etja kappi. Þórhallur telur hins vegar síður en svo komið nóg af spurningakeppnum enda sé þetta einfaldlega eitt skemmtilegasta sjónvarpsefnið sem völ er á.