Ný störf á Ísafirði

Undanfarið hafa borist miður góð tíðindi frá Ísafirði vegna lokunar starfsstöðvar Marels, rannsóknarstofunnar Agar og uppsagna starfsmanna Símans.

Það segir sig sjálft að Ísfirðinga og Vestfirðinga munar um þessi störf. Kallað er eftir aðstoð stjórnvalda að bregðast við og gera eitthvað í málinu, svo sem að færa störf úr opinbera geiranum vestur á firði. Þingmenn harma ástandið en koma ekki með lausnir.

Ísfirðingar verða að vinna að lausnum sinna mála í samvinnu við ríkisvaldið og fyrirtækin á staðnum. Að búa til störf á heimavelli tryggir væntanlega að þau störf verða ekki flutt burtu með einu pennastriki. Hægt er með góðum vilja ríkisvaldsins, sveitarfélagsins og sjávarútvegsfyrirtækjanna á staðnum að búa til störf sem byggja á því sem Ísfirðingar hafa í túnfætinum hjá sér, hafinu. Það þarf að gera sér grein fyrir þeim möguleikum sem liggja í auðlindum hafsins.

Hvað Vestfirði áhrærir þá tel ég mikla framtíðarmöguleika fólgna í því að koma upp vel skilgreindu og markvissu rannsóknar- og þróunarstarfi í sambandi við fiskeldi í sjó. Möguleikarnir á umtalsverðu fiskeldi á hefðbundnum tegundum og öðrum tegundum í Arnarfirði og í Ísafjarðardjúpi eru augljóslega fyrir hendi. Þetta eru djúpir og miklir firðir með miklu magni sjávar sem fer þar í gegn.

Nú þegar er umtalsvert starf unnið í Ísafjarðardjúpi í fiskeldi. Ég tel að nú sé lag til þess að virkja þann möguleika sem felst í því að setja á stofn rannsóknar- og þróunarmiðstöð fyrir fiskeldi í sjó (og þá er ekki átt við laxfiska) og byggja á því rannsóknar- og þróunarstarfi sem þegar hefur verið unnið í Ísafjarðardjúpi, á Patreksfirði, Tálknafirði og í Arnarfirði.

Æskilegt væri að ríkisvaldið með sínar mennta- og rannsóknarstofnanir, ásamt sveitarfélaginu og sjávarútvegsfyrirtækjunum á Vestfjörðum, sameinuðust um stofnun slíks seturs. Þetta þyrfti að gerast í tengslum við háskólasamfélag og er þá nærtækast að huga að eflingu háskólaseturs á Ísafirði meðal annars með þetta í huga. Þessi rannsóknar- og þróunarvinna á ekki að miðast einungis við eldi á fiskum heldur líka líftækni. Þróun og rannsóknir í þágu líftækniiðnaðar sem byggist á auðlindum hafsins er óplægður akur.

Það er ekki ólíklegt að rannsóknar- og þróunarstofnun sem þessi verði einnig til þess að störf skapist í hátækniiðnaði sambærileg við þau störf sem eru að hverfa frá Ísafirði. Tækifærin liggja víða, það er bara að koma auga á þau og láta til skara skríða. Fleira gefur af sér en álver.

Höfundur er í hópi Margrétar Sverrisdóttur sem ásamt fleirum vinnur að stofnun nýs framboðs.