Skemmtir 50 milljónum jarðarbúa í viku hverri

„Verðlaunin voru afhent á sunnudaginn í síðustu viku á Century Hyatt Hotel en ég vann ekki, því miður,“ segir Egill Örn Egilsson, kvikmyndatökumaður sem var nýlega tilnefndur til svokallaðra ASC-verðlauna fyrir kvikmyndatöku sína í sjónvarpsþáttunum CSI: Miami.

Verðlaunin eru meðal þeirra virtustu hjá tökumönnum í Bandaríkjunum og þykir jafnvel enn meiri heiður að vera tilnefndur til þeirra en til sjálfra Óskarsverðlaunanna eða Emmy. „Annars var þetta bara mjög mikil upphefð að vera tilnefndur og hljóta náð fyrir augum þessarar nefndar sem skipuð er gömlum refum úr þessum iðnaði,“ bætir Egill Örn við. Hann upplýsir jafnframt að þessi tilnefning hafi orðið til þess að tilboðum rigni yfir hann en Egill tekur þessu öllu með stakri ró.

Sjónvarpsþættirnir um Horatio Caine og meinafræðingardeild hans í Miami njóta gríðarlegra vinsælda um allan heim og er talið að í kringum fimmtíu milljónir horfi á þá reglulega. Þeir eru aðrir í röðinni í þessari meinafræðinga-þríleik Jerry Bruckheimer en til eru bæði CSI: Las Vegas og CSI: New York en hvorugur þessara þátta hefur náð að skáka vinsældum Miami-liðsins sem allir hafa verið sýndir á Skjá einum. Egill Örn hefur samfara því að stjórna kvikmyndatöku í þáttunum sest í leikstjórastólinn og komið að framleiðslu nokkurra þátta. Þegar Fréttablaðið náði tali af honum var tökumaðurinn reyndar önnum kafinn og varð að bregða sér frá í stutta stund enda var David Caruso beint fyrir framan nefið á honum og tökur á þætti nýhafnar.

Egill, eða Eagle eins og hann kallar sig, hefur verið búsettur í Bandaríkjunum í átján ár og segir það alltaf hafa verið í spilunum að ílengjast í Englaborginni. Hann hóf feril sinn sem tökumaður hjá Zalman King en leikstjórinn er þekktur fyrir erótískar kvikmyndir sínar. Síðan lá leiðin í sjónvarpsþáttaröðina Red Shoe Diaries þar sem erótíkin var aldrei langt undan og svo loks í CSI þar sem tökumaðurinn hefur blómstrað. „Ég er búinn að vera gera þetta í einn og hálfan áratug,“ segir Egill Örn en vinna við þættina er mikil törn. „En ákaflega gaman, þú ert með fótinn á bensíngjöfinni í tíu mánuði og léttir ekki pressunni af henni fyrr en allt er búið,“ segir Egill.

Í hina tvo mánuðina ferðast Egill síðan um heiminn, tekur upp auglýsingar og viðrar mótórfákinn en Egill er mikill mótórhjólakappi og þykir fátt skemmtilegra en að þeysast um fjöll og firnindi á hjólinu.