Ég vann Ronaldo í skriðsundi

Frakkland - Brasilía, úrslitaleikurinn á HM fyrir 8 árum. Ég horfði á þennan frábæra leik á marókósku kaffihúsi í Barcelona, þrír fjórir aðrir á staðnum og frekar dauf stemning. Kaffið var hinsvegar ósvikið, svo sterkt að ég svitnaði jafn mikið og leikmennirnir á State de France vellinum. Maður þessa leiks var Zidane, skoraði tvö skallamörk í fyrri hálfleik, slökkti gersamlega eldinn í Brasilísku leikmönnunum. Hann var að leika sinn síðasta leik á franskri grundu á laugardaginn, flott fréttamynd þar sem hann er að taka af sér fyrirliðabandið á þessum sama velli. Frakkar unnu Mexikóa 1-0, ,,vináttuleikurinn var frekar bragðdaufur'' sagði vinur minn sem sá hann í franska sjónvarpinu, ,,heimamenn skiptu ótt og títt inná, og varla marktæk frammistaða hjá mínum mönnum Frökkum.''

Sammála því, sagði ég, þótt ég hafi ekki séð leikinn. Í vináttuleikjum fyrir stórmót einsog HM þá eiga hlutirnir að vera tilraunaeldhús, prófa allar mögulegar uppskriftir, krydd og samsetningar, til að vera klár í fyrsta leik.

 Meira að segja Englendingar voru venju fremur góðir í æfingaleiknum gegn Ungverjum í gær, þrátt fyrir að vera greinilega með tilraunastarfsemi í uppstillingu liðsins. Það er meiriháttar kjarkað að setja fermingadrenginn og undrabarnið Theo Walcott frá Arsenal í liðið, þrátt fyrir að augljóst sé að þar er stórkostlegur knattspyrnumaður að koma í heiminn.

Frakkar voru hreint alls ekki tilbúnir í síðustu heimsmeistarakeppni og töpuðu eftirminnilega í opnunarleiknum, í svo leiðinlegum leik að heimurinn þurfti áfallahjálp að 90 mínútum loknum. Franski forsetisráðherrann Dominique de Villepin er búinn að hitta franska liðið í æfinguabúðum í Clairefontaine skammt frá París og stappa í þá stálinu.

 Þetta er skemmtilegt lið á góðum degi, verst að þeir eiga ekki fimm eða sex eintök af Tierry Henry, það vantar tilfinnanlega fleiri afburðaleikmenn einsog hann og Zidane, og vonandi er eitthvað eftir á tankinum hjá honum blessuðum.

Í umræddum úrslitaleik var grannur táningur í fremstu sóknarlínu Brassanna, sjálfur Ronaldo sem hefur heldur látið á sjá hinn síðari ár. Það eru margir að vona að hann lifni við í Þýskalandi, þótt það sé kannski ólíklegt, Ronaldo er nett latur og jafnvel sérhlífinn ef marka má hvernig hann spilar með Real Madrid. Ég er alltaf svolítið montinn af því að hafa unnið hann í skriðsundi fyrir nokkrum árum, í sundlaug í Cannes í Frakklandi. Ég sá hann koma álengdar og haltra ofaní laugina, sjálfsagt nýstiginn uppúr erfiðum meiðslum. Ég stóðst ekki mátið þegar hann svamlaði líktog ósjálfbjarga gamalmenni í miðri lauginni, og tók kröftugan skriðssundssprett, fór örugglega frammúr honum og að bakkanum hinumeginn. Ronaldo vissi reyndar ekki af þessari keppni, en samt, þetta eru staðfest úrslit, ég vann.