Lést þegar brú féll á Jótlandi

Einn lést og fimm slösuðust þegar vegbrú á Jótlandi hrundi í dag. Verið var að vinna við lagfæringar á brúnni þegar hún gaf sig.

Maðurinn sem lést var fimmtíu og átta ára gamall og var að vinna við viðgerðir á brúnni þegar hún gaf sig. Fjórir aðrir verkamenn slösuðust og auk þess einn vegfarandi sem átti leið hjá. Brúin er rétt utan við Álaborg og svo virðist sem stuðningsgrindur undir henni hafi gefið sig. Töluverð ringulreið greip um sig á vettvangi og umferð á stórri hraðbraut stöðvaðist alveg um tíma. Ekki liggur fyrir hvers vegna brúin gaf sig, en tildrög slyssins eru í rannsókn hjá lögreglu.