Þingið í Nepal verður endurreist

Konungur Nepals ætlar að endurreisa þingið í landinu. Með því vill hann aftur koma á lýðræði í landinu og friði eftir stanslaus átök í þrjár vikur.

Mótmælin í Nepal undanfarnar vikur hafa beinst að Gyanendra konungi en gerð er sú krafa að hann afsali sér einræðisvaldi sem hann tók sér fyrir rétt rúmu ári þegar hann rak þing landsins, að sögn vegna þess að stjórnvöldum gengi illa að berja á uppreisnarmönnum Maóista sem hafa barist fyrir kommúnísku Nepal í áratug.

Á föstudag bauðst konungur til að ræða við stjórnarandstöðuna um þátttöku í ríkisstjórn landsins. Stjórnarandstæðingar sögðu hins vegar tilboðið ekki ganga nógu langt og höfnuðu því. Mótmæli héldu því áfram.

Það var svo síðdegis í dag sem Gyanendra konungur ávarpaði þjóð sína og sagðist þá ætla að endurreisa þingið í landinu. Með því vildi hann koma aftur á lýðræði í Nepal og friði. Neðri deild þingsins mun koma saman til fundar á föstudag. Leiðtogar stjórnarandstöðuflokka segja þetta sigur fólksins.

Konungur tók þó ekki í ávarpi sínu í dag á öllu því sem almenningur hefur gert athugasemd við síðan mótmæli hófust en einna helst hefur verið krafist að stjórnarskrá landsins verði endurskoðuð. Búast má þó við að það atriði verði tekið til umræðu þegar þing kemur saman.