Hryðjuverkaárás í Egyptalandi

Að minnsta kosti 30 fórust og um 160 særðust, þar af fjölmargir lífshættulega, þegar þrjár sprengjur sprungu á veitingastað, kaffihúsi og í stórmarkað í ferðamannabænum Dahab í Egyptalandi síðdegis í dag. Mubarak Egyptalandsforseti segir þetta hryðjuverk sem verði að refsa fyrir.

Bærinn Dahab er afar fjölsóttur og vinsæll ferðamannastaður við Aqabaflóa á austanverður Síanai-skaga. Vitni segja mikinn reyk hafa lagt frá vettvangi eftir sprengingarnar en algjör skelfing greip um sig. Tugir lögreglu- og sjúkrabíla komu á vettvang á vettvang.

Sprengjunar sprungu um klukkan korter yfir fimm síðdegis að íslenskum tíma og stutt mun hafa verið á milli þeirra. Ríkissjónvarpið í Egyptalandi segir að ekki hafi verið um sjálfsvígssprengjuárás að ræða heldur hafi sprengjurnar verið fjarstýrðar.

Hosni Mubarak, Egyptalandsforseti, sagði í kvöld að árásirnar væru níðingsverk hryðjuverkamanna. Hann lagði áherslu á að það yrði að hafa upp á þeim sem bæru ábyrgð á árásunum svo hægt yrði að láta þá gjalda fyrir þær samkvæmt lögum.

Fyrir tveimur áratugum komu á sjónarsviðið hreyfing sem leggur áherslu á að koma Mubarak frá völdum og stofna strangtrúað íslamskt ríki í Egyptalandi. Í október 1990 var þáverandi þingforseti ráðinn af dögum og síðar var reynt að myrða þrjá ráðherra. Í júní 1995 var gerð árás á býlalest Mubaraks í Addis Ababa, höfuðborg Eþíópíu en forsetinn slapp frá því tilræði ómeiddur. Um það bil 1200 manns hafa fallið í átökum en samtökin hafa aðallega látið á sér kræla í suðurhluta landsins á árunum 1992 til 1997 en þá myrtu liðsmenn samtakanna 58 erlenda ferðamenn og 4 Egypta í Luxor.

Síðustu ár hafa fjölmargar sprengjuárásir verið gerðar á ferðamannastaði á sunnanverðum Sinai skaga. Í júlí í fyrra fórust rúmlega 60 og um 200 særðust þegar þrjár sprengjur sprungu á ferðamannastaðnum Sharm al-Sheik.

Ekki liggur fyrir nú hverjir bera ábyrgð á árásinni í dag. Fregnir herma að egypsk yfirvöld hafi komist á snoðir um starfsemi hryðjuverkasamtaka á Síanaí skaga en ekkert er vitað frekar um það.

Samkvæmt upplýsingum NFS mun hópur Íslendinga hafa farið í leiguflug til Egyptalands fyrir helgi en þeir munu halda til á öðrum stað í landinu.