Óvíst með bardaga Hopkins og Jones

Draumabardagi þeirra Bernard Hopkins og Roy Jones Jr gæti nú verið í hættu, því illa gengur að semja um peningahliðina á bardaganum, sem fyrirhugaður var þann 11. mars næstkomandi. Báðir hnefaleikarar mega að vísu muna fífil sinn fegurri, en þó var talið víst að húsfyllir yrði þegar þessir fyrrum kóngar í sínum þyngdarflokki mættust aftur í hringnum.

Jones hafði betur þegar þeir mættust snemma á ferli sínum árið 1993, en þeir fóru svo í sitthvoran þyngdarflokkinn og höfðu báðir ótvíræða yfirburði á sínu sviði í mörg ár þar á eftir. Báðir hafa nú þurft að láta í minni pokann á síðustu mánuðum, en eiga inni einn stóran peningabardaga ef umboðsmenn þeirra ná að komast að samkomulagi um peningahliðina á uppátækinu.