Fuglaflensa að verða landlæg í Tyrklandi?

Fuglaflensa getur orðið landlæg í Tyrklandi og breiðst út til nágrannaríkjanna að mati Sameinuðu þjóðanna. Rússneski þjóðernissinninn Vladímír Sírínovskí vill að herinn skjóti farfugla frá Tyrklandi.

Þrjú systkini létust úr fuglaflensu í Austur-Tyrklandi í síðustu viku. Í gær var hins vegar litli bróðir þeirra útskrifaður af sjúkrahúsinu í Van og virtist hann hinn hressasti þegar fréttamenn komu í heimsókn.

"I like to play and I like to go to school"

Ekki eru allir jafn áhyggjulausir og Hassan litli því í dag varaði Matvæla- og landbúnaðarstofnun Sameinuðu þjóðanna við að fuglaflensa gæti orðið landlæg í Tyrklandi og breiðst þaðan út til nágrannalandanna yrði ekki brugðist við með markvissum hætti, til dæmis með hertri landamæragæslu og slátrun alifugla

"The situation is worrying because we have more outbreaks than we thought."

Alþjóðaheilbrigðisstofnunin ítrekaði aftur á móti í dag að enn væri engin ástæða til að örvænta. Í baráttunni við flensuna væri lykilatriði að upplýsa almenning og halda ró sinni.

"I want to conclude by saying the worst situation is a panic situation."

Þingmenn Dúmunar, neðri deildar rússneska þingsins ræddu í dag aðgerðir til að sporna við útbreiðslu þessa vágests. Á meðal þeirra sem þar lögðu orð í belg var þjóðernissinninn Vladimír Sírínovskí sem á sínum tíma vildi breyta Íslandi í fanganýlendu. Hann skoraði á ríkisstjórnina að koma í veg fyrir að farfuglar frá Tyrklandi flygju yfir til Rússlands. Hann sagði jafnvel koma til greina að hermenn tækju sér stöðu á landamærunum og skytu allan fiðurfénað sem reyndi að fljúga yfir.