Svik og prettir vísindamannsins

Svik og prettir er einkunnin sem verk Hwangs Woos-suks, eins virtasta fræðimanns heims á sviði stofnfrumurannsókna fékk í dag. Þetta er áfall fyrir rannsóknir í lífvísindum, segir íslenskur sérfræðingur á þessu sviði.

Uppgötvunum Hwang Woo-suk á sviði stofnfrumurannsókna var á sínum tíma fagnað mjög í heiminum enda vöktu þær vonir um að lækning við sjúkdómum á borð við Parkinsons-veiki væri í sjónmáli. Fyrir nokkru vöknuðu hins vegar grunsemdir um að maðkur væri í mysunni og í dag kvað svo Ríkisháskólinn í Seúl í Suður-Kóreu upp sinn dóm.

"Hwang Woo-suk getur ekki búið til stofnfrumur sem eru sniðnar að þörfum sjúklinga eins og hann hélt fram í grein í vísindablaðinu Science á síðasta ári," sagði Chung Myung-Hee, yfirmaður rannsóknanefndar háskólands. "Hann getur heldur ekki klónað líkamsfrumur líkt og hann hélt fram í ritgerð árið 2004 sem var grunnurinn að ritgerð hans á síðasta ári."

Stofnfrumur eru ósérhæfðar frumur sem geta þróast í sérstakar frumugerðir. Í greinum sem birtust í virtum fræðitímaritum kvaðst Hwang hafa klónað slíkar frumur úr ellefu sjúklingum en nú þykir fullsannað að allar hans niðurstöður vandlega ofinn lygavefur. Hneykslið hefur valdið miklum titringi meðal fræðimanna um allan heim enda er svindlið þeim umtalsvert áfall.

Eiríkur Steingrímsson, prófessor við læknadeild Háskóla Íslands, segir málið mikið áfall fyrir rannsóknir í lífvísindum. Hann segir þrátt fyrir þetta að kerfið sem vísindamenn hafi komið sér upp sé ekki ónýtt, þrátt fyrir að það hafi bilað að vissu leyti. Eftir stendur að aðrir vísindamenn verði að geta endurtekið rannsóknir vísindamanna og fengið sömu niðurstöður til að þær séu teknar trúanlegar og í ljós hafi komið að það væri ekki hægt í þessu tilfelli.

Rannsóknarnefnd háskólans í Seúl komst þó að þeirri niðurstöðu að allt hefði verið með felldu þegar Hwang klónaði hundinn Snúbbí á síðasta ári.