Tilfinningatónleikar hjá Láru

Lára Rúnarsdóttir heldur tónleika í Þjóðleikhúskjallaranum í kvöld í tilefni af útkomu plötu hennar Þögn. Við unnum að plötunni allt síðasta sumar. Svo fór hún í smá bið því það eru svo margir sumarsmellir á henni, segir Lára hlæjandi. Annars er þetta er svona lágstemmd melódísk tilfinningaplata svona tilfinningamúsík.

Tólf lög eru á plötunni og eru þau öll eftir Láru. Flest þeirra eru sungin á íslensku. Lára gaf út plötuna Standing Still fyrir þremur árum en þá söng hún einungis á ensku. Ég sem alltaf á ensku en ákvað að breyta til fyrir nýju plötuna og semja nýja íslenska texta við lögin. Það gekk í 60-70 prósentum tilvika. Hin lögin urðu bara óþjál og því eru þau á ensku, segir Lára en á nýju plötunni syngur hún mikið um sínar daglegu hugsanir. Á þeim tíma sem ég var að semja lögin var ég að velta fyrir mér ýmsum spurningum sem ég skildi ekki þá en skil betur í dag.

Lára lék á nokkrum tónleikum í Los Angeles fyrir skömmu og gekk að eigin sögn nokkuð vel. Ég spilaði á svona litlum sætum klúbbum í Hollywood. Það gekk rosalega vel og fór í reynslubankann. Það er ágætt að spila fyrir aðra en nánustu vini og fjölskyldu, segir Lára sem er á leið til Spánar sem skiptinemi en hún er í tónlistarkennaranámi í Kennaraháskóla Íslands.

Bræðurnir Birkir og Daði Birgissynir, úr hljómsveitinni Jagúar, unnu með Láru að plötunni sem og trommuleikarinn Kiddi, sem áður var í Hjálmum, og bassaleikarinn Pétur Sigurðsson. Þeir munu allir spila með Láru á tónleikunum í kvöld sem hefjast kl. 21.