Uppgjör við síðustu plötu

Hljómsveitin Baggalútur hefur sent frá sér nýtt lag, Allt fyrir mig, sem Björgvin Halldórsson syngur, en það verður á nýju plötunni þeirra, Aparnir í Eden. Freyr Gígja Gunnarsson ræddi við Guðmund Pálsson um lag sem er hálfgerður ómagi.

Baggalútur sló í gegn á síðasta ári með plötunni Pabbi þarf að vinna en þar léku þeir köntrítónlist eins og sannir Nashville-búar. Eftir þessar vinsældir lögðust félagarnir í dvala og íhuguðu hvernig þeir gætu mögulega bryddað upp á einhverjum nýjungum enda kom það ekki til greina að hjakka í sama farinu. Hawaii-hljóðfærið ukulele hafði heillað þá um nokkurt skeið og því var ákveðið að blanda því saman við köntríið sem þeir höfðu náð góðum árangri með.

Nýja lagið, Allt fyrir mig, stingur reyndar í stúf við það sem koma skal á nýju plötunni en þegar Fréttablaðið náði tali af Guðmundi Pálssyni, liðsmanni Baggalúts, var hann nýkominn frá Króatíu þar sem hann hafði verið að sleikja sólina ásamt fjölskyldu í viku. "Lagið hefði í raun átt að vera á síðustu plötu, það er hálfgert uppgjör við hana," útskýrir hann. "Þegar ljóst var að Björgvin hefði ákveðið að taka sönginn að sér kom hins vegar aldrei neitt annað til greina en að hafa lagið svona," bætir hann við.

Hljómsveitin nýtur liðsinnis tveggja blástursleikara frá Nashville en Allt fyrir mig var tekið upp á fjórum stöðum. "Lagið sjálft var tekið upp í Geimsteini, Björgvin söng í Sýrlandi, blásturshljóðfærin voru hljóðrituð í Omni Sound Studios í Nashville en önnur umhverfishljóð voru síðan tekin upp í Félagsheimilinu á Flúðum," segir Guðmundur sem lýsir laginu sem hálendisköntríslagara. "Það er einhvern veginn hægt að heyra í vindinum án þess að hann sé þar, lagið er með eyðimerkurbrag og hálendið er jú okkar eyðimörk." útskýrir Guðmundur sem sparaði ekki stóru orðin um hæfileika Björgvins Halldórssonar. "Björgvin hafði ákaflega lítið fyrir þessu," segir Guðmundur en stórsöngvarinn minnir óneitanlega á Johnny Cash í laginu. "Björgvin er enda á svipuðum stalli hjá okkur og Cash í Bandaríkjunum."