Þar sem myrkraverkin gerast

Hryllingsmyndasumarið heldur áfram á Íslandi en í gær var kvikmyndin Silent Hill frumsýnd. Hún er byggð á vinsælum tölvuleik frá Konami-fyrirtækinu en myndir byggðar á tölvuleikjum hafa yfirleitt ekki náð þeim hæðum sem vonast hefur verið til.

Rose hefur miklar áhyggjur af litlu stelpunni sinni Sharon en hún þjáist af óþekktum geðsjúkdómi sem læknar ráða ekki við. Henni er ráðlagt að setja dóttur sína á geðveikrahæli en þráast við. Þrátt fyrir fortölur eiginmanns síns ákveður hún að halda til bæjarins Silent Hill en Sharon hrópar það nafn í svefni. Þegar mæðgurnar nálgast bæinn stekkur fyrir bíl þeirra einhver óþekkt vera og þær lenda utan vegar með þeim afleiðingum að Rose rotast. Þegar hún vaknar er dóttir hennar horfin sporlaust inn í bæinn. Rose leitar aðstoðar hjá lögreglukonunni Cybil Bennet og saman halda þær af stað inn í bæinn sem lítur vægast sagt skuggalega út, umvafinn þoku og allskyns kynjaverum. Fljótlega verður Rose ljóst að upptök veikinda dóttur hennar má rekja til þessa skuggalega staðar og hún sjálf er hluti af einhverri skelfilegri fortíð.

Það eru þau Radha Mitchell og Sean Bean sem leika aðalhlutverkin í þessari spennuhrollvekju. Mitchell vakti mikla athygli fyrir leik sinn í kvikmyndinni Melinda and Melinda sem Woody Allen leikstýrði en Sean Bean er hvað þekktastur fyrir að hafa leikið óþokkann Alec Trevelyan í fyrstu Bond-mynd Pierce Brosnan auk þess að hafa tekið þátt í þrekvirkinu Lord of the Rings sem Boromir. Leikstjórinn er Christope Gans sem gerði meðal annars Crying Freeman, mjög frambærilega samúræjamynd.